ອາເບວຮູ້ໄດ້ແນວໃດວ່າຕ້ອງເຮັດແນວໃດເພື່ອຖວາຍເຄື່ອງບູຊາທີ່ຖືກຕ້ອງຕໍ່ພຣະເຈົ້າ? ​

ຄວາມສໍາຄັນຂອງການເປີດເຜີຍໂດຍພຣະວິນຍານຕໍ່ຜູ້ເຊື່ອທີ່ແທ້ຈິງນັ້ນ ບໍ່ສາມາດທີ່ຈະເນັ້ນໜັກຫຼາຍເກີນໄປໄດ້ເລີຍ. ການເປີດເຜີຍມີຄວາມໝາຍຕໍ່ທ່ານຫຼາຍກວ່າທີ່ທ່ານຄິດ. ຕອນນີ້ຂ້າພະເຈົ້າບໍ່ໄດ້ເວົ້າເຖິງພຣະທໍາພິວອນ (ການເປີດເຜີຍ) ເຫຼັ້ມນີ້ແລະຕົວທ່ານ. ແຕ່ຂ້າພະເຈົ້າກໍາລັງເວົ້າເຖິງການເປີດເຜີຍ ທັງໝົດ. ມັນມີຄວາມສໍາຄັນຢ່າງຍິ່ງຕໍ່ຄຣິສຕະຈັກ. ທ່ານຈື່ໃນມັດທາຍ ບົດທີ 16 ໄດ້ບໍ່ ທີ່ພຣະເຢຊູໄດ້ຊົງຖາມພວກສາວົກວ່າ:

"

ມະນຸດທັງຫຼາຍເວົ້າວ່າ ເຮົາຜູ້ເປັນບຸດມະນຸດແມ່ນໃຜ?

ພວກເຂົາທູນຕອບວ່າ, ບາງຄົນວ່າແມ່ນໂຢຮັນບັບຕິສໂຕ; ບາງຄົນວ່າແມ່ນເອລີຢາ; ແລະຄົນອື່ນໆວ່າແມ່ນເຢເຣມີຢາ ຫຼືແມ່ນຜູ້ໜຶ່ງໃນພວກຜູ້ພະຍາກອນ.

ພຣະອົງຊົງກ່າວກັບພວກເຂົາວ່າ, ແຕ່ພວກເຈົ້າເດວ່າເຮົາແມ່ນໃຜ?

ຊີໂມນເປໂຕທູນຕອບວ່າ, ພຣະອົງຄືພຣະຄຣິດ, ພຣະບຸດຂອງພຣະເຈົ້າຜູ້ຊົງພຣະຊົນຢູ່.

ພຣະເຢຊູທູນຕອບລາວວ່າ, ຊີໂມນບຸດໂຢນາເອີຍ, ທ່ານກໍເປັນສຸກ, ເພາະວ່າເນື້ອໜັງແລະເລືອດບໍ່ໄດ້ເປີດເຜີຍສິ່ງນີ້ແກ່ທ່ານ, ແຕ່ແມ່ນພຣະບິດາຂອງເຮົາຜູ້ຊົງສະຖິດໃນສະຫວັນ.

ແລະເຮົາບອກທ່ານອີກວ່າ, ທ່ານຄືເປໂຕ, ແລະເທິງສິລານີ້ ເຮົາຈະສ້າງຄຣິສຕະຈັກຂອງເຮົາໄວ້; ແລະປະຕູນະລົກຈະເອົາຊະນະຄຣິສຕະຈັກນັ້ນບໍ່ໄດ້ເລີຍ.

"

ຊາວໂລມັນກາໂຕລິກກ່າວວ່າ ຄຣິສຕະຈັກຖືກສ້າງຂຶ້ນເທິງຕົວເປໂຕ. ນັ້ນເປັນຄວາມຄິດຝ່າຍເນື້ອໜັງແທ້ໆ. ພຣະເຈົ້າຈະສ້າງຄຣິສຕະຈັກຂອງພຣະອົງເທິງມະນຸດທີ່ບໍ່ໝັ້ນຄົງ ຈົນເຖິງຂັ້ນປະຕິເສດພຣະເຢຊູເຈົ້າແລະສາບແຊ່ງໃນຂະນະທີ່ເຮັດແນວນັ້ນໄດ້ແນວໃດ? ພຣະເຈົ້າບໍ່ສາມາດສ້າງຄຣິສຕະຈັກຂອງພຣະອົງເທິງມະນຸດຄົນໃດທີ່ເກີດມາໃນບາບໄດ້. ແລະມັນບໍ່ແມ່ນກ້ອນຫີນບາງກ້ອນທີ່ຢູ່ນັ້ນ ຄືກັບວ່າພຣະເຈົ້າໄດ້ເຮັດໃຫ້ພື້ນດິນບ່ອນນັ້ນສັກສິດ. ແລະມັນກໍບໍ່ແມ່ນຢ່າງທີ່ຊາວໂປຣເຕສຕັງເວົ້າວ່າ ຄຣິສຕະຈັກຖືກສ້າງຂຶ້ນເທິງພຣະເຢຊູ. ແຕ່ມັນຄື ການເປີດເຜີຍ. ຈົ່ງອ່ານຕາມທີ່ຂຽນໄວ້ວ່າ: “ເນື້ອໜັງແລະເລືອດບໍ່ໄດ້ ເປີດເຜີຍ ສິ່ງນີ້ແກ່ທ່ານ, ແຕ່ພຣະບິດາຂອງເຮົາໄດ້ເປີດເຜີຍ, ແລະ ເທິງສິລານີ້ (ການເປີດເຜີຍ) ເຮົາຈະສ້າງຄຣິສຕະຈັກຂອງເຮົາໄວ້:” ຄຣິສຕະຈັກຖືກສ້າງຂຶ້ນເທິງການເປີດເຜີຍ, ເທິງຄໍາວ່າ “ພຣະເຈົ້າຊົງກ່າວດັ່ງນີ້”.

ອາເບວຮູ້ໄດ້ແນວໃດວ່າຕ້ອງເຮັດແນວໃດເພື່ອຖວາຍເຄື່ອງບູຊາທີ່ຖືກຕ້ອງຕໍ່ພຣະເຈົ້າ? ໂດຍຄວາມເຊື່ອ ເພິ່ນໄດ້ຮັບການເປີດເຜີຍເລື່ອງເລືອດ. ຄາອິນບໍ່ໄດ້ຮັບການເປີດເຜີຍເຊັ່ນນັ້ນ (ເຖິງແມ່ນວ່າລາວມີພຣະບັນຍັດກໍຕາມ) ລາວຈຶ່ງບໍ່ສາມາດຖວາຍເຄື່ອງບູຊາທີ່ຖືກຕ້ອງໄດ້. ການເປີດເຜີຍຈາກພຣະເຈົ້າຄືສິ່ງທີ່ເຮັດໃຫ້ເກີດຄວາມແຕкຕ່າງ ແລະເຮັດໃຫ້ອາເບວໄດ້ຮັບຊີວິດອັນຕະຫຼອດໄປເປັນນິດ. ຕອນນີ້ທ່ານອາດຈະຮັບເອົາສິ່ງທີ່ສິດຍາພິບານເວົ້າ, ຫຼືສິ່ງທີ່ໂຮງຮຽນພຣະຄຣິດທໍາສອນ, ແລະເຖິງແມ່ນວ່າມັນຈະຖືກສອນໃຫ້ທ່ານດ້ວຍຖ້ອຍຄໍາທີ່ສະຫຼະສະຫຼວຍພຽງໃດກໍຕາມ, ຈົນກວ່າພຣະເຈົ້າຈະເປີດເຜີຍແກ່ທ່ານວ່າພຣະເຢຊູຄືພຣະຄຣິດ, ແລະແມ່ນເລືອດນັ້ນທີ່ຊໍາລະລ້າງທ່ານ, ແລະພຣະເຈົ້າຄືພຣະຜູ້ຊ່ວຍໃຫ້ລອດຂອງທ່ານ, ທ່ານຈະບໍ່ມີວັນມີຊີວິດອັນຕະຫຼອດໄປເປັນນິດໄດ້ເລີຍ. ແມ່ນການເປີດເຜີຍຝ່າຍວິນຍານເທົ່ານັ້ນທີ່ເຮັດໃຫ້ເກີດສິ່ງນີ້.